Marami sa atin ang talagang hirap sa buhay at naghihikahos. Kulang ang maliit na kita upang tustusan ang gastusin sa bahay, pag-aaral ng mga anak, o ang paglilibang paminsan-minsan. Malaking porsyento ng ating mga kababayan ang hindi nakapag-aral at walang trabaho. Karamihan sa atin ay sinisisi ang gobyerno sa kung anumang kahirapa na kanilang pinagdadaanan.
May nagawa na nga ba tayo?
Marahil, minsan sa buhay mo ay dumaan ang panahon na naisip mo ang bagay na ito. Kung minsan, mahilig tayong magreklamo, sinisisi natin ang gobyerno na inilagay natin sa taas upang pamahalaan tayo. Subalit may nagawa ka na ba upang baguhin ang buhay mo? May nagawa ka na ba upang masabi mo na totoong walang ginagawa ang mga taong ito? Kung isa ka sa mga taong nanonood lamang ng balita, umiinom sa gabi kasama ng barkada at walang planong maghanap ng trabaho dahil hinihintay mong matupad ang mga pangakong ito, ang kawalan mo ng kinabukasan ay dahil din sayo. Huwag mong sisihin ang mahirap na magulang mo, ang walang kwentang gobyerno, o ang guro mo na walang naiturong mabuting asal sa iyo. Karamihan sa mga taong nasa paligid mo ay pinagdaanan din ito, ngunit hindi sila nagrereklamo gaya ng ginagawa mo.
Gumising ka!
Oo, tama. Gumising ka. Hindi sa lahat ng oras ay maghahanap ka ng sisisihin sa kahirapan mo sa buhay. Maraming tao ang umangat gamit lamang ang sipag at tiyaga. Hindi lahat ng tao ay kinailangan ng perang puhunan upang maabot ang mga pangarap nila sa buhay, mangilan-ngilan ay nagsikap upang akyatin ang hagdan ng kahirapan patungo sa pag-asenso. Kung nagawa nila ito, malamang ikaw rin, kaya mo.
No comments:
Post a Comment